Рекламный баннер 990x90px header-top
Рекламный баннер 990x90px header-bottom
Гамса второкласснöй школалöн история
Гамса второкласснöй школалöн история
1901-öд вося йирым тöлысся 28-öд лунö важ коми Гам сиктын (сиктыс пырис сэки Вöлöгда губернялöн Яренск уездö), Михайло-Архангельскöй вичкосянь неылын, воссис второкласснöй церковно-приходскöй школа. Медшöр могнас татшöм учебнöй заведениеясыслöн вöлí индöма дасьтыны начальнöй школалы велöдысьясöс да вичколы вежаайяслы отсасьысьясöс (саломщикъясöс).
«Гам сикт сулалö Яренск карсянь нелямын верста сайын, Яренск – Усть-Сысольскса тракт вылын, Эжва юлöн веськыд берег вылын. Тайö Гам, кодöс пасйöма «Житие Стефана Пермского» гижöдын, кытчö 1379-öд воын сувтлíс миссионер Степан Котлассянь Коми мулань мунíгöн, мед лыддьыны проповедь Кристос эскöм йылысь. Гамö воöм бöрын Степан пыртöма аслас эскöмö öткымын коми йöзöс, та бöрын водзö мунöма Емдíнлань. А йöзыс бара важас сетчöмаöсь, босьтчöмаöсь пуысь вöчöм идолъяслы эскыны. Сэсся Вежа Степан бöр кутöма лэччыны-мунны, воöма Гам сиктöдз, аддзöма тайöс да ёна скöрмöма, шуöма: «Синтöм йöз пö тí». Тайö кывъяс шуöм бöрын, важ йöз висьталöм серти, гамса сиктса олысьяс, быттьöкö пö, омöля аддзöны.
XIX-ö нэмын гамсаяс, енджыкаса нывбабаяс, омöля либö дзик эз тöдны роч кыв. Вöдитíсны видз-му, быдтíсны нянь, вöралíсны да чери кыйисны, уджалíсны вöрын – заптíсны вöр и пуръясöн кылöдíсны керъяссö Кардорöдз. Кыдзи и став коми йöз, зэв ёна эскисны Енлы и пуктíсны став вынсö, медым велöдны ассьыныс челядьсö. Сиктын вöлíны кык церковно-приходскöй школа (мужскöй да женскöй), Арабач грездын нöшта вöлí öти школа, кöнí велöдчисны öтлаын зонкаяс и нывкаяс. Куимнан школаас велöдчисны 130 мортöдз. Яренскса уездын второкласснöй школа Гамын вöлí медводдзаöн и дзик öти.
Стрöйбасö второкласснöй школа улö кыпöдлöмаöсь инженер Дружинин проект серти. Гамса олысьяслы вöлí зэв окота, мед найö сиктын лоас выль школа. Крестьянаяс дон босьттöг ассьныс лöсьöдöмаöсь керьяссö да ю кынмöм бöрын, йи кузя, вöвъясöн вайöмаöсь Эжва юлöн мöдар берег вывсянь местаöдз. Котласскöй стрöительяс регыд кадöн, куим тöлысьöн, и кöрттувтöг кыпöдöмаöсь школа. Стрöйба лэптöм вылö мунöма Синод казнаысь 7866 шайт. Школаыс кык судтаа: улыс судтаас вöлí велöдысьяслы жыръяс, сёянíн, кухня, узянíн. Мöд судтаас – класснöй комнатаяс, ремесленнöй класс улö жыръяс, библиотека.
Второкласснöй школа восьтöм лоис зэв кыпыд лоöмторйöн эз сöмын татчöсса олысьяслы, но и тшöтш коми войтырлы мукöд вöлöстьысь. Гаж вылö воисны зэв уна йöз: вичкоын служитысьяс, уездöн веськöдлысьяс да чина йöз, татчöс да мукöд матíгöгöрса сиктъясысь олысьяс. Воис уна телеграмма, кытöны выль школалы сиисны сöвмöм да вынсялöм, мед сíйö нималíс эз сöмын аслас мичлунöн да зумыдлунöн, а медъёна – аслас велöдчысьясöн, аскиалунся вежöра да ассьыс уджсö и челядьöс радейтысь велöдысьясöн, тöлка да преданнöй ас чужан мулы йöзöн». («Вологодскöй епархиальнöй ведомости» газетысь, 15.01.1902 г.).
1901-öд воын вöлí примитöма 24 зонпосниöс, кодъяс таöдз помалöмаöсь начальнöй школа, кужöмаöсь гижны-лыддьысьны, артасьны. Йирым тöлысь 29-öд лунö школаын заводитчисны занятиеяс.
Медшöр велöдан предметъяснас вöлíны: Закон Божий, роч кыв, арифметика, отечественнöй история, география, геометрическöй черчение, чистописание, дидактика, церковно-славянскöй кыв, церковнöй пение, рисование. Школаын тшöтш велöдíсны кипом удж вöчöмö – слесарнöй и переплётнöй уджö. Велöдчöмыс мунíс куим во чöж, роч кыв вылын.
Школа веськöдлысьöн индíсны Иван Степанович Покровскийöс (1868-1904), кодí сíдз жö нуöдíс Закон Божий урок. Сíйö чужлöма Вöлöгда губерниялöн Яренск уездса Туглим сиктын священник семьяын. Помавлöма Вöлöгдаса духовнöй семинария. 1897-öд воын сíйöс вуджöдöмаöсь вежаайöн Гам сиктса вичкоö. Сылöн гöтырыс, Елизавета Павловна, уджалíс бурдöдысьöн. Покровскийяс вöлíны роч йöзöн. Медым вöлí кокниджык сёрнитны сиктса олысьяскöд да стöчджыка гöгöрвоны найöс, гозъялы ковмис велöдны коми кыв. Мам-бать асланыс квайтнан челядьыскöд ичöтдырсянь сёрнитíсны коми кыв вылын.
Дас вит воысь унджык школаын велöдлöма Александр Николаевич Образцов (1870-1926). Сíйö помавлöма Вöлöгдаса духовнöй семинария, вöлöма бур да водзмöстчысь велöдысьöн. Бура тöдлöма роч литература, радейтлöма и гöгöрволöма музыка.
Гамса второкласснöй школа помалíсны 118 велöдчысь. На пöвстын вöлíны нималана учёнöйяс, гижысьяс, велöдысьяс, общественнöй да политическöй деятельяс.
Медводдза выпусксö помалíсны вит морт. На лыдын вöлí Питирим Александрович Сорокин (1889-1968), чужлöма Турья сиктын. Школаын велöдчигöн век вöлöма «первой ученикöн». Сíйö лоис став мирын нималана учёнöй, Америкаын социологическöй школа лöсьöдысь, Гарвардса университетын профессор. П.А. Сорокинкöд öттшöтш велöдчисны Ф. С. Коковкин да С.В. Матвеев. Федор Степанович (1889-1938) – чужлöма Зöвсьöрт сиктын. Гражданскöй война кадö вöлöма Яренскöй уездын военнöй комиссарöн.
Степан Васильевич Матвеев (1885-1970) – чужлöма Семуково грездын. Нэм чöжсö уджавлöма Семуковса начальнöй школаын велöдысьöн и веськöдлысьöн. Зэв вылö донъялöмаöсь сылысь уджсö, пасйöмаöсь Ленин орденöн да РСФСР-са заслуженнöй учитель нимöн.
1912 воын Гамса второкласснöй школа помалöма Дмитрий Александрович Батиев (1896-1941). Чужлöма Кебырыб грездын гöль крестьянин семьяын. Аслас шöр могöн Д.А. Батиев пуктылöма Коми мулы автономия шедöдöм. 1921-öд воын Коми лоö автономнöй обласьтöн. 2011 восянь Д.А. Батиевлысь нимсö новлö Емдíн районса Гамса школа.
Гамса второкласснöй школаын велöдчывлöмаöсь: Георгий Афанасьевич Старцев (1902-1943) – коми учёнöй-этнограф, историк; Павел Григорьевич Доронин (1904-1967) – коми гижысь, историк. Сійö медводдзаӧн аддзис да восьтіс ки помысь гижӧм Вычегодско-Вымскӧй летопись. Тайӧ аддзӧмторсӧ зэв вылӧ донъялісны уна ученӧй; Степан Николаевич Коновалов (1894-1989) – учёнöй-педагог, сíйö вöлí подув пуктысьяс пöвстын öтиöн, кодъяс заводитíсны нуöдны удж коми школаясын челядьöс роч кывйö велöдöм кузя. Учёнöйлысь уджсö вöлí пасйöма Ушинский медальöн; Михаил Петрович Богомолов (1894-1943) – чужлöма Богомолово грездын. Комиысь медводдзаяс лыдын босьтíс высшöй педагогическöй образование. Петроградса университет помалöм бöрын локтíс уджавны Коми обласьтö, первой уджалíс Сыктывкарса педтехникумын, сэсся дас воысь унджык зíлис велöдысьöн Коми пединститутын и кутшöмкö кад вöлí историческöй факультетöн веськöдлысьöн; Иван Александрович Минин (1894-1957) – чужлöма Гам сиктын. Школаын велöдчöма öти кадö Д. Батиевкöд, вöлöмаöсь другъясöн. Медъёнасö Мининлы велöдчигас кажитчöма геометрическöй черчение да серпасасьöм. Помалöма Ленинградса университет, инженерно-стрöительнöй факультет. Уджавлöма Сыктывкарын архитекторöн.
Гамса второкласснöй церковно-приходскöй школа тупкысьöма 1918 воын. Революция бöрын зданиеын заводитöма уджавны öтувъя трудöвöй школа.
Текстсö лöсьöдíс М.Н. Мингалева, Гамса музейöн веськöдлысь.
1901-öд вося йирым тöлысся 28-öд лунö важ коми Гам сиктын (сиктыс пырис сэки Вöлöгда губернялöн Яренск уездö), Михайло-Архангельскöй вичкосянь неылын, воссис второкласснöй церковно-приходскöй школа. Медшöр могнас татшöм учебнöй заведениеясыслöн вöлí индöма дасьтыны начальнöй школалы велöдысьясöс да вичколы вежаайяслы отсасьысьясöс (саломщикъясöс).
«Гам сикт сулалö Яренск карсянь нелямын верста сайын, Яренск – Усть-Сысольскса тракт вылын, Эжва юлöн веськыд берег вылын. Тайö Гам, кодöс пасйöма «Житие Стефана Пермского» гижöдын, кытчö 1379-öд воын сувтлíс миссионер Степан Котлассянь Коми мулань мунíгöн, мед лыддьыны проповедь Кристос эскöм йылысь. Гамö воöм бöрын Степан пыртöма аслас эскöмö öткымын коми йöзöс, та бöрын водзö мунöма Емдíнлань. А йöзыс бара важас сетчöмаöсь, босьтчöмаöсь пуысь вöчöм идолъяслы эскыны. Сэсся Вежа Степан бöр кутöма лэччыны-мунны, воöма Гам сиктöдз, аддзöма тайöс да ёна скöрмöма, шуöма: «Синтöм йöз пö тí». Тайö кывъяс шуöм бöрын, важ йöз висьталöм серти, гамса сиктса олысьяс, быттьöкö пö, омöля аддзöны.
XIX-ö нэмын гамсаяс, енджыкаса нывбабаяс, омöля либö дзик эз тöдны роч кыв. Вöдитíсны видз-му, быдтíсны нянь, вöралíсны да чери кыйисны, уджалíсны вöрын – заптíсны вöр и пуръясöн кылöдíсны керъяссö Кардорöдз. Кыдзи и став коми йöз, зэв ёна эскисны Енлы и пуктíсны став вынсö, медым велöдны ассьыныс челядьсö. Сиктын вöлíны кык церковно-приходскöй школа (мужскöй да женскöй), Арабач грездын нöшта вöлí öти школа, кöнí велöдчисны öтлаын зонкаяс и нывкаяс. Куимнан школаас велöдчисны 130 мортöдз. Яренскса уездын второкласснöй школа Гамын вöлí медводдзаöн и дзик öти.
Стрöйбасö второкласснöй школа улö кыпöдлöмаöсь инженер Дружинин проект серти. Гамса олысьяслы вöлí зэв окота, мед найö сиктын лоас выль школа. Крестьянаяс дон босьттöг ассьныс лöсьöдöмаöсь керьяссö да ю кынмöм бöрын, йи кузя, вöвъясöн вайöмаöсь Эжва юлöн мöдар берег вывсянь местаöдз. Котласскöй стрöительяс регыд кадöн, куим тöлысьöн, и кöрттувтöг кыпöдöмаöсь школа. Стрöйба лэптöм вылö мунöма Синод казнаысь 7866 шайт. Школаыс кык судтаа: улыс судтаас вöлí велöдысьяслы жыръяс, сёянíн, кухня, узянíн. Мöд судтаас – класснöй комнатаяс, ремесленнöй класс улö жыръяс, библиотека.
Второкласснöй школа восьтöм лоис зэв кыпыд лоöмторйöн эз сöмын татчöсса олысьяслы, но и тшöтш коми войтырлы мукöд вöлöстьысь. Гаж вылö воисны зэв уна йöз: вичкоын служитысьяс, уездöн веськöдлысьяс да чина йöз, татчöс да мукöд матíгöгöрса сиктъясысь олысьяс. Воис уна телеграмма, кытöны выль школалы сиисны сöвмöм да вынсялöм, мед сíйö нималíс эз сöмын аслас мичлунöн да зумыдлунöн, а медъёна – аслас велöдчысьясöн, аскиалунся вежöра да ассьыс уджсö и челядьöс радейтысь велöдысьясöн, тöлка да преданнöй ас чужан мулы йöзöн». («Вологодскöй епархиальнöй ведомости» газетысь, 15.01.1902 г.).
1901-öд воын вöлí примитöма 24 зонпосниöс, кодъяс таöдз помалöмаöсь начальнöй школа, кужöмаöсь гижны-лыддьысьны, артасьны. Йирым тöлысь 29-öд лунö школаын заводитчисны занятиеяс.
Медшöр велöдан предметъяснас вöлíны: Закон Божий, роч кыв, арифметика, отечественнöй история, география, геометрическöй черчение, чистописание, дидактика, церковно-славянскöй кыв, церковнöй пение, рисование. Школаын тшöтш велöдíсны кипом удж вöчöмö – слесарнöй и переплётнöй уджö. Велöдчöмыс мунíс куим во чöж, роч кыв вылын.
Школа веськöдлысьöн индíсны Иван Степанович Покровскийöс (1868-1904), кодí сíдз жö нуöдíс Закон Божий урок. Сíйö чужлöма Вöлöгда губерниялöн Яренск уездса Туглим сиктын священник семьяын. Помавлöма Вöлöгдаса духовнöй семинария. 1897-öд воын сíйöс вуджöдöмаöсь вежаайöн Гам сиктса вичкоö. Сылöн гöтырыс, Елизавета Павловна, уджалíс бурдöдысьöн. Покровскийяс вöлíны роч йöзöн. Медым вöлí кокниджык сёрнитны сиктса олысьяскöд да стöчджыка гöгöрвоны найöс, гозъялы ковмис велöдны коми кыв. Мам-бать асланыс квайтнан челядьыскöд ичöтдырсянь сёрнитíсны коми кыв вылын.
Дас вит воысь унджык школаын велöдлöма Александр Николаевич Образцов (1870-1926). Сíйö помавлöма Вöлöгдаса духовнöй семинария, вöлöма бур да водзмöстчысь велöдысьöн. Бура тöдлöма роч литература, радейтлöма и гöгöрволöма музыка.
Гамса второкласснöй школа помалíсны 118 велöдчысь. На пöвстын вöлíны нималана учёнöйяс, гижысьяс, велöдысьяс, общественнöй да политическöй деятельяс.
Медводдза выпусксö помалíсны вит морт. На лыдын вöлí Питирим Александрович Сорокин (1889-1968), чужлöма Турья сиктын. Школаын велöдчигöн век вöлöма «первой ученикöн». Сíйö лоис став мирын нималана учёнöй, Америкаын социологическöй школа лöсьöдысь, Гарвардса университетын профессор. П.А. Сорокинкöд öттшöтш велöдчисны Ф. С. Коковкин да С.В. Матвеев. Федор Степанович (1889-1938) – чужлöма Зöвсьöрт сиктын. Гражданскöй война кадö вöлöма Яренскöй уездын военнöй комиссарöн.
Степан Васильевич Матвеев (1885-1970) – чужлöма Семуково грездын. Нэм чöжсö уджавлöма Семуковса начальнöй школаын велöдысьöн и веськöдлысьöн. Зэв вылö донъялöмаöсь сылысь уджсö, пасйöмаöсь Ленин орденöн да РСФСР-са заслуженнöй учитель нимöн.
1912 воын Гамса второкласснöй школа помалöма Дмитрий Александрович Батиев (1896-1941). Чужлöма Кебырыб грездын гöль крестьянин семьяын. Аслас шöр могöн Д.А. Батиев пуктылöма Коми мулы автономия шедöдöм. 1921-öд воын Коми лоö автономнöй обласьтöн. 2011 восянь Д.А. Батиевлысь нимсö новлö Емдíн районса Гамса школа.
Гамса второкласснöй школаын велöдчывлöмаöсь: Георгий Афанасьевич Старцев (1902-1943) – коми учёнöй-этнограф, историк; Павел Григорьевич Доронин (1904-1967) – коми гижысь, историк. Сійö медводдзаӧн аддзис да восьтіс ки помысь гижӧм Вычегодско-Вымскӧй летопись. Тайӧ аддзӧмторсӧ зэв вылӧ донъялісны уна ученӧй; Степан Николаевич Коновалов (1894-1989) – учёнöй-педагог, сíйö вöлí подув пуктысьяс пöвстын öтиöн, кодъяс заводитíсны нуöдны удж коми школаясын челядьöс роч кывйö велöдöм кузя. Учёнöйлысь уджсö вöлí пасйöма Ушинский медальöн; Михаил Петрович Богомолов (1894-1943) – чужлöма Богомолово грездын. Комиысь медводдзаяс лыдын босьтíс высшöй педагогическöй образование. Петроградса университет помалöм бöрын локтíс уджавны Коми обласьтö, первой уджалíс Сыктывкарса педтехникумын, сэсся дас воысь унджык зíлис велöдысьöн Коми пединститутын и кутшöмкö кад вöлí историческöй факультетöн веськöдлысьöн; Иван Александрович Минин (1894-1957) – чужлöма Гам сиктын. Школаын велöдчöма öти кадö Д. Батиевкöд, вöлöмаöсь другъясöн. Медъёнасö Мининлы велöдчигас кажитчöма геометрическöй черчение да серпасасьöм. Помалöма Ленинградса университет, инженерно-стрöительнöй факультет. Уджавлöма Сыктывкарын архитекторöн.
Гамса второкласснöй церковно-приходскöй школа тупкысьöма 1918 воын. Революция бöрын зданиеын заводитöма уджавны öтувъя трудöвöй школа.
Текстсö лöсьöдíс М.Н. Мингалева, Гамса музейöн веськöдлысь.
20:57 29.11.2023 16+
Выбор редакции