95 во сайын чужӧма Коми АССР-са нимӧдана артистка Орлова Екатерина Алексеевна.

95 во сайын чужӧма Коми АССР-са нимӧдана артистка Орлова Екатерина Алексеевна.

Сійӧ чужӧма 1929-ӧд вося öшым тӧлысь 2-ӧд лунӧ Емдін районса Гам сиктын, Погостын (тадзи пасйöма чужöм йылысь свидетельствоын). Челядьдырся кадыс, ар дасöдз, кольöма сэнⅰ бать-мамыскöд да чой-вокыскöд . Шöр школа помалöма война кадö Сыктывкарын. Ичöтсянь нывка радейтлöма сьывны, да и гöлöсыс вöлöма мича и ён. Карса школаын велöдчигöн заводитöма сьывны Концертно-эстраднӧй бюроын (ӧні Коми Республикаса филармония). Вит во мысти Екатерина Коняева (нывдырся овыс) пырöма уджавны Коми АССР-са сьылан да йӧктан каналан ансамбльын (ӧні Коми Республикаын В. Морозов нима «Асъя кыа» сьылан да йӧктан каналан ансамбль) хорын сьылысьöн. 1947—1951-ӧд воясын Екатерина велӧдчöма Сыктывкарса шылада училищӧын вокальнöй юкöн вылын. Училище помалöм бöрын выпускницаöс мöдöдöмаöсь уджавны Коми республиканскöй филармонияö солистка-вокалисткаöн.

Тайö жö кадö Е. Коняева олöмын лоисны вежсьöмъяс. 1949-öд воын том ань петⅰс верöс сайö Михаил Федорович Орлов сайö, кодⅰ помаллⅰс Москваын консерватория. Регыд кадöн чужисны кык пи: Владимир и Евгений.

Сэсся Екатерина Орлова вит во чöж велӧдчис Ленинградын Н. А. Римский-Корсаков нима консерваториян. Орловалы мойвиис велöдчыны танⅰ тöдчана да мир пасьта нималана педагогъяслысь. Öти курс вылын Екатеринкаöд велöдчис Эдуард Хиль. 1960-öд воын сⅰйö помалⅰс консерватория «Сольное пение» специальность кузя и лоис опернöй и концертнöй сьылысьöн.

Водзö Е.Орловалöн олöмыс и творческöй уджыс вöлⅰ йитчöма Республикаса опера да балет канмуса театркöд. кöнⅰ сⅰйö зⅰлис солистка-вокалисткаöн матö кызь во.

1958-öд вося моз 26-öд лунö Сыктывкарын воссис Республикаса музтеатр, петкöдлⅰсны П.И. Чайковскийлысь опера «Евгений Онегин». Е. Орлова сьылⅰс сэнⅰ партия няня Филланьевналысь и Ольга Лариналысь. Бöрынджык сⅰйö петкöдчис уна мукöд операын: сьылⅰс Карменлысь роль Жорж Бизелöн операын, «Русалка» операын петкöдчис княгиня Ольгалöн рольын. «Царская невеста» спектакльын Н.А. Римский-Корсаков серти Е.Орлова ворсⅰс Любашалысь роль. Вöлⅰны и уна мукöд рольяс, эз сöмын лирическöй, но и комедийнöй жанрса спектакльясын.

1967-öд воын музтеатр пуктⅰс «Домна Каликова» опера, мый лоис медводдза коми национальнöй операяс пытшкысь öтиöн. Е Орлова сьылⅰс Домналöн мамлысь партия. Тайö операсö петкöдлⅰсны Москваын. Кор артистъяс бöр воисны гортö, Сыктывкарö, уналы на пиысь вöлⅰ сетöма почетнöй звание. Орлова лоис Коми АССР-са заслуженнöй артисткаöн.

Е. Орловаöн пуктöма ыджыд пай коми музыкальнöй искусство сöвмöдöмö. Операса рольяс кындзи, сⅰйö сьылⅰс коми композиторъясöн гижöм сьыланкывъяс да коми йöзкостса сьыланкывъяс. На пиын «Чужан му», «Менам Эжвалы», «Алöй ленточка», «Сыктывкар», «Зыбкадорса сьыланкыв», «Енэж кодь лöз синъяса» сьыланкывъяс да мукöд.

Екатерина Алексеевна некор эз вунöдлⅰ чужан Гам сиктсö. Отпускъяс дырйи шойччигмоз волⅰвлⅰс рöдвуж ордö, и паныдасьыгъяс дырйи матысса йöз век öтвылысь сьылⅰсны важся коми сьыланкывъяс.

Е.А. Орлова кулⅰс 1978 вося сора 20-öд лунö. Гуалöма Сыктывкарын.

Андрей Орлов, Е.А. Орловалöн внукыс, 2019-öд воын Гамса музейö козьналⅰс аслас пöчыслысь фотокарточкаяс, документъяс, афишаяс, пызан. На пыр музейса уджлысьяс вермöны видзны паметь нимöдана артистка Екатерина Орлова йылысь.

М. Мингалева, Гамса музейöн веськöдлысь